SKALI Gudja

Il-Ġimgħa 31 ta’ Lulju 2026, SKALI Gudja organizzat, għat-tielet sena konsekuttiva, serata mużiko-letterarja fuq iz-zuntier tal-Knisja Ta’ Loretu, il-Gudja. L-attendenza kienet waħda straordinarja, u dawk kollha li attendew esprimew kliem ta’ tifħir għall-inizjattiva u għall-ħidma kontinwa ta’ SKALI Gudja favur is-siti interessanti li hija mogħnija bihom il-Gudja, u l-patrimonju letterarju u mużikali Malti.

Din is-sena, SKALI Gudja reġgħet stiednet lill-kantanta Mariele Zammit, li għandha rabtiet mill-qrib mal-Gudja. Magħha ngħaqdu l-għannej Justin Galea u l-kitarristi Denise Vella u Mark Vella (Ta’ Kalċ), kif ukoll Calcidon Vella (Ta’ Mustaċċa). Flimkien ippreżentaw programm ta’ għana tradizzjonali Malti.

Għall-ewwel darba, SKALI Gudja tat spazju wkoll lit-tfal billi ppreżentat poeżiji miktuba minn studenti taż-żewġ skejjel tal-Gudja. Dawn il-poeżiji, miktuba minn tfal ta’ bejn l-10 u l-11-il sena bl-għajnuna tal-għalliema u tal-ġenituri tagħhom, offrew perspettiva ġdida u sinċiera dwar il-Gudja.

Matul is-serata ġew ippreżentati wkoll kitbiet storiċi u tagħrif dwar il-Knisja Ta’ Loretu, miktuba u adattati minn Marija Vella u ġie ppreżentat ukoll tagħrif dwar l-istorja tal-edukazzjoni fil-Gudja, ibbażat fuq kitba ta’ Marija Vella u riċerka ta’ Andrea Gatt.

Għall-attività attendew is-Sindku Romeo Baldacchino flimkien mal-kunsilliera tal-Gudja, il-kapijiet taż-żewġ skejjel tal-Gudja, is-Sinjura Marion Falzon Ghio, Kap tal-Iskola Primarja tal-Kulleġġ San Benedittu – Gudja, u s-Sinjura Marion Cutajar, Kap tal-Iskola Santa Giovanna Antida – Gudja, flimkien ma’ Suor Melissa D’Amico. Kienu preżenti wkoll għalliema, ġenituri u qraba tal-istudenti-parteċipanti.

SKALI Gudja tirringrazzja mill-qalb lil kull min attenda u appoġġja din l-attività. Ringrazzjament speċjali jmur lill-isponsors VisitMalta, il-Kunsill Lokali tal-Gudja, Emtes u l-Familja Zammit għall-appoġġ tagħhom. Nirringrazzjaw ukoll lil John Joseph Pace għas-servizzi tas-sound u t-teknoloġija, lil Cyprian Dalli għat-teħid tar-ritratti, lil Fondazzjoni Sagħtar għar-rigali għat-tfal, kif ukoll lil Ġużi Caruana, Mario Ellul u Anthony Ellul għall-assistenza tagħhom fil-loġistika.

“Jiena u sħabi nemmnu fi SKALI Gudja u l-kontribut li din tista’ tagħti għal ġid tal-Gudja u dan il-ħsieb ser ikompli jiggwidana u jmexxina fiz-zmien li ġej” – Presidenti Dr Simon Manicolo

Nhar il-Ħadd 1 ta’ Marzu, 2026 SKALI Gudja żammet il-Laqgħa Ġenerali Annwali fiċ-Ċentru Parrokjali. Matul din il-laqgħa, apparti r-rapport amministrattiv u finanzjarju, ġew eletti il-membri ġodda tal-Kumitat. Il-Kumitat għas-snin 2026-2028 ser ikun kompost minn Nutar Simon Manicolo – President, is-Sur Fabio Scicluna – Vici President, is-Sur Joseph Charles Galdes – Tezorier, is-Sa Denise Bezzina – Segretarju, il-Perit John Paul Galdes – Uffiċċjal għar-Relazzjonijiet Pubbliċi, is-Sna Marija Vella, is-Sna Rebecca Calleja, is-Sa Nadia Gatt Gafa, u s-Sna Shevaun Rooney bħala membri.

Fid-diskors tiegħu il-President irringrazzja lill-membri preżenti tal-fiduċja li għal darb’oħra urew fiħ, u lill-membri kollha ta’ SKALI Gudja li f’dawn is-snin ħadmu qalih u ddedikaw il-ħin limitat tagħhom fi ħdan l-għaqda. Huwa rringrazzja lil membri uxxenti tal-Kumitat; is-Sur Christopher Vella li tul dawn l-aħħar sentejn okkupa l-kariga ta’ Segretarju u s-Sna Maria Serpina tal-assistenza tagħha lill-għaqda. Huwa rringrazzja wkoll lill-kollaboraturi ta’ SKALI Gudja li sostnew u ser jibqgħu jagħtu l-kontribut tagħhom sabiex SKALI Gudja tibqa’ tikber u twettaq il-funzjoni tagħha fil-Gudja. Hawnhekkk huwa semma lis-Sinjuri Bertram Portelli, Brandon Caruana, John Joseph Pace, Winston Spiteri, Martin Abela, Tyronne Grima, Andrea Gatt, il-Perit Patrick Calleja (President ta’ Din l-Art Ħelwa) u l-uffiċċjali tagħha, lis-Sindku Romeo Baldacchino u l-Arċipriet Norman Zammit. Ringrazzjament partikolari kien indirizzat lill-membri ġodda; Rebecca Calleja, Nadia Gatt Gafa, u Shevaun Rooney li ngħaqdu ma’ SKALI Gudja għall-ewwel darba.

Il-President qal li kien jittama illi l-lista ta’ kollaboraturi tkompli tikber għax jemmen li hemm ħafna persuni li jistgħu jaqsmu l-abbiltajiet tagħhom għal ġid tal-Gudja.

Il-President qal li r-Rapporti Amministrattivi kienu jindikaw b’mod ċar illi minkejja l-limitazzjonijiet ta’ riżorsi in partikolari umani ħafna mill-obbjettivi ntlaħqu u twettqu jew qiegħdin fi stadju avvanzat. Żied li SKALI Gudja ħadmet sabiex dak li nbeda fl-2020 ma jintilifx, anzi fejn u kemm hu possibbli jibqa’ jissaħħah u dan biex il-patrimonju, it-tradizzjonijiet u l-istorja rikka ta’ dan ir-raħal jkunu magħrufa u apprezzati u imħarsa minn kulħadd.

Matul dan iz-zmien SKALI Gudja stabbiliet ruħha dejjem aktar bħala Għaqda important fil-Gudja. F’dan iż-żmien kien hemm enfasi fuq il-fatt li jiġi stabbilit kalendarju ta’ attivitajiet u avvenimenti tal-għaqda mifrux fuq sena, u li kellu jservi biex ir-rizorzi limitati jkunu utilizzati aħjar. Saret ħidma biex l-għaqda jkollha għajnuna minn kollaboraturi fejn persuni b’abbiltajiet u ġejjin minn oqsma differenti jaħdmu fuq proġetti tal-għaqda u jaqsmu magħha u r-residenti l-ħilitet tagħhom, iżda b’inqas formalita’. Inżamm u tkabbar il-kuntatt u l-parteċipazzjoni f’attivitajiet ta’ għaqdiet oħra fil-raħal inkluż il-Kunsill Lokali, il-Parroċċa u l-Għaqdiet tal-Banda. Inġiebu fondi mill-Aġenzija Żgħażagħ u ġew esplorati għejun oħra ta’ funding.

F’dawn is-sentejn saru wkoll preparamenti għal inizzjattivi li possibilment ser tkun qed tvara l-għaqda fil-ġimghat u/jew xhur li ġejjin, fosthom Heritage Trail, Wirjiet ta’ fotografija, pubblikazzjoni ta’ ktejjeb għat-tfal tal-iskola primarja, u l-preżentazzjoni ta’ intervisti storiċi, fost oħrajn.

Il-President temm jgħid illi SKALI Gudja dejjem lesta tilqa’ kull ħsieb u inizzjattiva, għajnuna, parteċipazzjoni u sostenn u dan dejjem għal ġid tal-Gudja u r-residenti u l-pubbliku in ġenerali.

Kull min hu interessat jista’ ikellimna fuq il-pagna soċjali tagħna, jew permezz ta’ email jew jagħmel kuntatt mal-membri tal-kumitat.

15 ta’ Diċembru 2025 sa 6 ta’ Jannar 2026

Għat-tieni sena konsekuttiva SKALI Gudja, bil-kollaborazzjoni ta’ Din l-Art Ħelwa u l-Presepisti Gudjani, ippreżentat wirja ta’ presepji artistiċi mill-15 ta’ Diċembru 2025 sas-6 ta’ Jannar 2026. Attivita’ li attirat numru konsiderevoli ta’ viżitaturi, inkluż tfal, li kellhom l-opportunita’ jespirmu bit-tpinġija l-idejat tagħhom marbutin ma’ din l-arti.

Kull min attenda seta’ japprezza l-fantasija, l-ħidma u r-reqqa tax-xogħlijiet esebiti. SKALI Gudja tifraħ lill-Presepisti Gudjani, u in partikolari lis-Sur Martin Abela, li flimkien ma’ numru ta’ presepisti rinomati, għal sena oħra ppreżenta b’tant dedikazzjoni wirja ta’ presepji ta’ livell għoli fil-Kappella Medjavali u pittoreska ta’ Bir Miftuħ. Kappella għal qalb il-Gudjani u wirt storiku b’rabta kbira u sinjifikattiva mal-Gudja.

Grazzi kbira tmur lil Din l-Art Ħelwa u s-Sinjuri Felix Rizzo, Peter Grima u Daphne Mangion, kif ukoll l-mistednin distinti u l-membri tal-pubbliku li attenda bi ħġaru. SKALI Gudja hija onorata li pparteċipat f’din l-inizzjattiva u tibqa’ twiegħed kull appoġġ.

Fis-7 ta’ Diċembru, SKALI Gudja, b’kollaborazzjoni mal-Historic Motorcycle Club, Rotta, Din l-Art Ħelwa u l-Kunsill Lokali tal-Gudja, organizzat wirja statika ta’ muturi storiċi u karozzi klassiċi VW f’Birmiftuħ, il-Gudja.

Minbarra li l-avveniment ġab flimkien kollezzjonisti u dilettanti f’ambjent medjevali, kellu wkoll aspett filantropiku u l-parteċipanti u dawk li attendew taw donazzjoni li fl-aħħar inġabret is-somma ta’ €500 li marret bħala donazzjoni lil Puttinu Cares.

Grazzi lil kulħadd għall-ġenerożità tagħkom.

SKALI Gudja bil-kollaborazzjoni ta’ Din l-Art Ħelwa, Growing Owls Child Care Centre u l-Kunsill Lokali tal-Gudja organizzat kunċert tal-Milied fil-Kappella ta’ Birmiftuħ.

Din is-sena dan il-kunċert korali u strumentali kellu l-isem Għanijiet tal-Milied f’Birmiftuħ u ġie mtella’ bil-parteċipazzjoni tal-Kor Assumpta Est (il-Kor tal-Parroċċa tal-Gudja) taħt id-direzzjoni ta’ Mro. Stefan Caruana, il-Kor Maranatha mill-Parroċċa tal-Furjana, taħt id-direzzjoni ta’ Mro. Manoel Pirotta, u l-‘University of Malta Junior College Ensemble’. Dawk prezenti setgħu jisimgħu għanjiet popolari tal-Milied u xogħlijiet muzikali marbutin ma’ dawn il-festi. Ta’ min jgħid illi bħala parti mill-Junior College Ensemble kien hemm ukoll erbgħa muziċisti zgħazagħ mill-Gudja. Wara l-attivita’ dawk prezenti setgħu igawdu l-kappella storika u l-ambjent tal-madwar waqt li jixorbu ftit mulled wine u iduqu xi ħelu tal-okkazzjoni.

Grazzi lil Din l-Art Helwa, Growing Owls Child Care Centre u Kunsill Lokali tal-Gudja.

Din is-sena SKALI Gudja bil-kollaborazzjoni mal-Historic Motorcycle Club, Rotta u Din l-Art Ħelwa organizzat wirja statika ta’ muturi storiċi u karozzi VW klassiċi. Din il-wirja minbarra li ġabet flimkien u f’post wieħed u meraviljuz, numru sabiħ ta’ entużjasti u kollezzjonisti kellha l-għan nobbli li jinġabru fondi b’għan filantropiku, din is-sena għal Puttinu Cares Foundation. L-ammont miġbur kien ta’ €500.

Fil-messaġġ tiegħu il-President tal-Għaqda filwaqt li rringrazzja ‘l parteċipanti kollha, wera l-apprezzament lejn il-kollezzjonisti li pprezentaw it-tezori tagħhom, li jgħozzu b’tant passjoni u attenzjoni. Zied li bħal fil-kaz tas-sena l-oħra, kien meraviljat bid-dedikazzjoni, il-ħin u l-investiment li l-istess kollezzjonisti jiddedikaw biex izommu kemm il-muturi u kif ukoll il-karozzi tagħhom f’kundizzjoni perfetta.

Waqt l-attivita’ il-kuratur ta’ Din l-Art Ħelwa s-Sur Felix Rizzo ta tagħrif storiku dwar il-kappella lill-parteċipanti.

Grazzi lil Din l-Art Ħelwa, Historic Motorcycle Club, Rotta u l-Kunsill Lokali Gudja.

Il-Ħamis 10 ta’ Lulju 2025, għat-tieni sena SKALI Gudja organizzat serata mużiko-letterarja fuq iz-zuntier tal-Knisja Ta’ Loretu. Għal darb’oħra l-attendenza kienet inkoraġġanti ħafna u kull min attenda kellu kliem ta’ tifħir għal din l-inizzjattiva u l-ħidma ta’ SKALI Gudja favur il-patrimonju Gudjan u t-teżori li huwa mogħni bihom dan ir-raħal. Din is-sena wkoll SKALI Gudja irnexxielha tipprezenta kitbiet marbutin intrinsikament mar-Raħal tal-Gudja flimkien ma’ akkumpanjament muzikali mill-pinna ta’ kompozituri Maltin. Din id-darba is-serata kienet tinkludi ġabra ta’ rakkonti dwar il-ħajja fil-Gudja fi zmien it-Tieni Gwerra mill-pinna tal-Maġistrat Dr Gawdenz Borg, proza oriġinali, miktuba apposta għal din l-okkazzjoni mill-pinna tal-awtur prolifiku Gudjan Bertram Portelli u akkumpanjament muzikali b’kanzunetti bil-Malti minn Mariele Zammit, kantanta li għandha rabtiet konsiderevoli mal-Gudja u li bil-kant melodiku tagħha tfittex li zzomm ħajja u tippromwovi l-għanja tipika Maltija. Għal din is-serata kienu prezenti il-familjari tal-Maġistrat Dr Gawdenz Borg b’waħda minn uliedu Doriette anke tipprezenta biografija awtentika f’waqtiet kommoventi, dwar missierha. Is-serata kienet ipprezentata minn Fabio Scicluna. Wara s-serata dawk preżenti setgħu jnaqqru u jixorbu xi ħaġa wkoll, f’ambjent pittoresk li toffri l-Kappella Ta’ Loretu u għal frisk ta’ lejla sajfija. Nieħdu l-okkażjoni biex nirringrazzjaw lil dawk kollha li attendew għal din is-serata li kellha wkoll konnessjoni ma’ Jum il-Gudja li jiġi ċelebrat fil-15 ta’ Lulju, u nistednukom tibqgħu ssegwu l-attivitajiet ta’ SKALI Gudja.

Għal aktar informazzjoni dwar SKALI Gudja u din l-attività nħeġġukom tagħfsu fuq il-link t’hawn taħt: https://www.facebook.com/skaligudja

Grazzi mill-qalb lill-isponsors Kunsill Lokali Gudja, JP Baldacchino, All Nuts, Pizza tal-Baker. Għal li jmiss! Grazzi wkoll lil Ġuzi Caruana, Mario Ellul u Anthony Ellul għall-assistenza fil-loġistika.

Għat-tieni sena SKALI Gudja organizzat taħdita fil-Kappella ta’ Birmiftuħ dwar Mapep Ġodda ta’ Żmien l-Assedju l-Kbir 1565. Din id-darba l-preżentazzjoni saret mis-Sur Joseph Schiro, wieħed mill-fundaturi u President tal-Malta Map Society, riċerkatur, studjuż tal-kartografija, awtur u kollezzjonist ta’ mapep u pubblikazzjonijiet antiki ta’ Żmien il-Kavallieri.

Is-Sur Schiro għamel preżentazzjoni interessanti ferm dwar riċerka li għamel riċentement u skoperti ta’ mapep ġodda ta’ Żmien l-Assedju l-Kbir. Huwa ta tagħrif dettaljat dwar dawn il-mapep u l-varjazzjonijiet tagħhom u saħansitra spjega l-provenjenza tagħhom u l-esperjenzi tiegħu biex akkwistahom u ġabhom lejn pajjiżna. Huwa saħaq li f’dan il-qasam wieħed qatt ma seta’ jkun ċert li ltaqa’ ma’ kollox jew li ra kollox għaliex dejjem kien hemm il-possibiltà ta’ skoperti ġodda. Żied li kien hemm mapep u materjal ieħor li kienu nstabu f’mużewijiet ta’ pajjiżi barranin u saħansitra f’kollezzjonijiet privati. Waqt l-attività dawk preżenti kellhom ix-xorti jaraw b’għajnejhom uħud mid-dokumenti u oġġetti li saret referenza għalihom fil-preżentazzjoni.

Is-Sur Schiro faħħar il-ħidma ta’ Dr Albert Ganado li kien il-pijunier tal-istudju dwar mapep antiki u manuskritti. Wara t-taħdita dawk preżenti kienu mistiedna għal tazza nbid fil-ġnien tal-Kappella. Grazzi kbira lil kull min attenda.

Grazzi tal-kontribut u l-assistenza lil Din l-Art Ħelwa, Kunsill Lokali tal-Gudja, Il-Pizza tal-Baker, Cosecasa u P.A.L – Pace Associates Ltd.

Il-President ta’ SKALI Gudja Dr Simon Manicolo akkumpanjat mit-teżorier, is-Sur Joseph Charles Galdes u l-Uffiċjal għar-Relazzjonijiet Pubbliċi, il-Perit John Paul Galdes żaru d-Dar tal-Providenza fejn iltaqgħu mad-Direttur tad-dar Rev. Fr Martin Micallef.

Matul din iż-żjara r-rappreżentanti ta’ SKALI Gudja ppreżentaw is-somma miġbura fl-attività tal-Erbgħa tat-Tniebri, dik ta’ €210.

Il-President sostna li din l-attività apparti li kienet issaħħaħ l-aspett spiritwali marbut ma’ dan iż-żmien kienet ukoll toffri sens ta’ karità u altruiżmu għal dawk kollha li attendew. Żied li s-suċċess ta’ dan kollu kien jawgura tajjeb għall-attivitajiet simili fil-futur. Min-naħa tiegħu Rev. Fr Martin Micallef filwaqt li rringrazzja l-Għaqda għal din l-inizjattiva awgura li dan il-ġest jibqa’ jitkattar partikolarment f’dan iż-żmien tas-sena għall-benefiċċju ta’ dawk kollha li kellhom ħtiġijiet partikolari.

16 ta’ April 2025

Qed naqsmu magħkom ftit ritratti tal-attività li SKALI Gudja organizzat bil-kollaborazzjoni tal-Arċipriet Fr Norman Zammit, u l-assistenza tal-Kunsill Lokali tal-Gudja nhar l-Erbgħa tat-Tniebri.

Din kienet l-ewwel attività tax-xorta tagħha li segwiet il-funzjoni fil-Knisja Parrokkjali dakinhar u li kellha l-għan li ssaħħaħ l-ispirtu ta’ talb, riflessjoni u karità marbutin mal-Ġimgħa Mqaddsa. Il-ħsibijiet tal-Via Sagra kienu mirqumin sew u l-atmosfera bil-fjakkoli tul il-mixja fil-mogħdija rurali li twassal għall-Kappella Ta’ Loretu kienet suġġestiva. L-attendenza kienet inkoraġġanti ħafna u s-somma miġbura mill-bejgħ tax-xemgħat kienet tammonta għal €210 li ser imorru kollha bħala donazzjoni għad-Dar tal-Providenza. Min attenda seta’ wkoll iżur il-wirja ta’ vari tal-Ġimgħa l-Kbira fil-Kappella Ta’ Loretu li kienet esebita mill-Familja Grech.

Nirringrazzjaw lill-Arċipriet tal-opportunità, il-Kunsill Lokali għas-sostenn, lill-voluntiera tal-Kappella Ta’ Loretu tal-għajnuna u lil kull min ingħaqad magħna f’din l-esperjenza. SKALI Gudja tħares ‘il quddiem sabiex tkompli taħdem favur it-tkattir u t-tisħiħ ta’ dak kollu li għandu rabta mal-Gudja.

Niltaqgħu!