Patrimonju Intanġibbli

Serata Mużiko-Letterarja f’ Ta’ Loretu

Nhar l-Erbgħa 10 ta’ Lulju 2024, SKALI Gudja organizzat serata mużiko-letterarja fuq iz-zuntier tal-Knisja Ta’ Loretu. Din is-serata li niżlet tajjeb ferm ma’ dawk kollha li attendew u li kienu numerużi kienet tinkludi tagħrif storiku dwar il-Knisja u l-inħawi Ta’ Loretu minn Fabio Scicluna li ppreżenta wkoll is-serata, qari ta’ poeżiji dwar il-Gudja mill-pinna tal-Gudjan Loreto Dalli minn Christopher Vella u Tyrone Grima u qari ta’ silta letterarja mill-awtur Gudjan Bertram Portelli li kiteb apposta għal din l-okkażjoni. Is-serata kienet tinkludi wkoll mużika fuq il-kitarra u kant mid-duo Joseph u Denise Bezzina li komplew żejnu l-atmosfera sabiħa bi bċejjeċ mużikali Maltin mill-pinna tal-kompożitur Gaetano Buttigieg magħruf bħala Gaetano Kanta. Wara s-serata dawk preżenti setgħu jżuru l-Knisja minn ġewwa u jnaqqru u jixorbu xi ħaġa wkoll. Kif kien previst din kienet serata pjaċevoli, f’post inkantevoli u f’ambjent ta’ paċi li joffru l-inħawi Ta’ Loretu. Kull min attenda ħa gost, kellu kliem ta’ tifħir u apprezza immens il-ħidma u l-impenn ta’ SKALI Gudja għal darb’oħra favur il-patrimonju Gudjan u t-teżori li huwa mogħni bihom dan ir-raħal. Nieħdu l-okkażjoni biex nirringrazzjaw lil dawk kollha li attendew għal din is-serata u nistednukom tibqgħu ssegwu l-attivitajiet ta’ SKALI Gudja.

Wara s-serata, grazzi lil Ġuzi Caruana, Mario Ellul u Anthony Ellul, dawk preżenti setgħu jżuru l-Knisja minn ġewwa u jnaqqru u jixorbu xi ħaġa wkoll.

Ritratti Grazzi lil Brandon Caruana
Attivita’: Taħdita fuq l-Ikonografija tal-Mewt u l-Arti Sagra minn Dr Christian Attard

Nhar il-25 ta’ Marzu, 2024 SKALI Gudja organizzat taħdita minn Dr Christian Attard, lettur fid-Dipartiment tal-Arti u l-Istorja tal-Arti fl-Università ta’ Malta u fil-Malta School of Art, ġewwa l-Kappella tal-Lunzjata bit-tema: ‘L-ikonografija tal-Mewt u l-Arti Sagra’. Tema addattata ħafna għal żmien il-Ġimgħa Mqaddsa.

F’din it-taħdita, li kienet ta’ interess u ntlaqgħet tajjeb ħafna minn dawk preżenti, Dr Attard tkellem fost l-oħrajn dwar ir-riti funerarji tal-Gran Mastri tal-Ordni f’Malta u l-impatt li dawn ħallew fuq il-poplu, li kienu jibdew il-preparamenti għalihom minn snin qabel il-mewt tal-Gran Mastru. Ġew preżentati diversi eżempji ta’ pitturi li juru l-aħħar mumenti fil-ħajja tal-individwu u kif il-pittur iwassal it-taqbida bejn it-tajjeb u l-ħażin. Dr Attard irrefera għal diversi monumenti funebri, imfakar tal-ħajja u l-mewt ta’ persuni prominenti, li jinstabu fil-Konkatidral ta’ San Ġwann u oħrajn ‘l hinn, u kif il-mewt tiġi ppersonifikata permezz ta’ ikonografiji differenti.

Wara t-taħdita dawk preżenti setgħu japprezzaw wirja żgħira ta’ kurċifissi antiki, imprezzabbli, u ta’ valur storiku kbir, liema kurċifissi jifformaw parti minn kollezzjonijiet privati aktar estensivi li għandhom is-Sur Jesmond Farrugia u s-Sur Christopher Vella – żewġ residenti Gudjani.

Din it-taħdida ttellgħet bis-sapport tal-iskema A4U tal-Aġenzija Żgħażagħ
Il-Gudja mill-lenti tal-Artist

Nhar il-Ħadd li għadda SKALI Gudja tellgħet l-attività Il-Gudja: mil-Lenti tal-Artist ġewwa Birmiftuħ. F’din l-attività kien hemm il-preżenza ta’ seba’ artisti li bdew ipinġu l-ambjent ta’ dan il-post minn angoli differenti. Interessanti l-individwaliżmu ta’ kull artist. Dan għaliex kull artist għażel li jpinġi bl-istil uniku tiegħu l-istess ambjent li jdawwar dan il-post. Fil-Kappella ta’ Birmiftuħ kien hemm esebezzjoni għaddejja tal-istess artisti li kienu qegħdin ipinġu u kif ukoll ta’ oħrajn. Barra minn hekk persuna mill-Għaqda Din l-Art Ħelwa ħadet ħsieb li ddawwar in-nies preżenti mal-Kappella u l-ġnien tagħha waqt li tgħaddi tagħrif storiku. Fl-aħħar tal-attività l-artisti nġabru fil-Kappella u ngħataw ċertifikat tal-parteċipazzjoni tagħhom.

^{Ritratti grazzi lill S. James Photography}
It-Tieni Episodju ta’ ‘Kont taf li?’

Taf li l-Gudja għandha Ġnien tal-Kmand? U min ikkommisjona dawn il-ġonna fl-irħula Maltin? Sib ir-risposta għal dawn il-mistoqsijiet f’dan il-filmat qasir li qiegħda tippubblika SKALI Gudja, bin-narrazzjoni ta’ Grupp Żgħażagħ Gudja. Dan huwa it-tieni episodju ta’ din is-sensiela bl-isem ta’ ‘Kont taf li?’ li ser tkun qiegħda tiġi ppubblikata ġimgħa iva u ġimgħa le fuq il-mezzi soċjali. F’dan l-episodju, Matthew Degiorgio jirrispondi il-mistoqsijiet t’hawn fuq filwaqt li jgħaddielna iktar informazjoni fuq il-Ġnien tal-Kmand tal-Gudja.

L-episodji li jmiss ser ikunu qed jiġi ppubblikati fuq il-paġna ta’ Facebook, Instagram u kif ukoll fuq YouTube. Segwu dawn il-paġni soċjali sabiex iżżommu ruħkom aġġornati ma din is-sensiela u ħafna aktar.
L-Ewwel Episodju ta’ ‘Kont taf li?’

Meta mxiet il-parroċċa ta’ Birmiftuħ għal dik tal-Gudja, u kemm kienet ilha tinbena il-knisja il-ġdida fil-misraħ tar-raħal? Dawn il-mistoqsijiet issib ir-risposta tagħhom f’dan il-filmat. Mħejji minn SKALI Gudja u nnarrat minn Grupp Żgħażagħ Gudja, dan huwa l-ewwel episodju tas-sensiela Kont taf li? li ser tkun qiegħda tiġi ppubblikata fuq il-mezzi soċjali tal-Għaqda. Fil-filmat, Marija Vella tgħaddielna ftit kurżitajiet fuq il-Knisja Parrokkjali u l-Parroċċa tal-Gudja.

L-episodju li jmiss ser ikunu qed jiġi ppubblikati nhar it-Tlieta 14 ta’ Marzu, fuq il-paġna ta’ Facebook, Instagram u kif ukoll fuq YouTube. Segwu dawn il-paġni soċjali sabiex iżżommu ruħkom aġġornati ma din is-sensiela u ħafna aktar.
Każinata SKALI; Inżuru l-Każini fil-Pjazza

Fl-okkażjoni tal-festa titulari ta’ Santa Marija, ilbieraħ, membri mill-Kumitat tal-Għaqda organizzaw Każinata fejn żaru ż-żewġ soċjetajiet mużikali tar-raħal tagħna La Stella u Marija Assunta u matulhom iltaqgħu ma’ membri mill-Kumitat taż-żewġ soċjetajiet kif ukoll man-nies li kienu preżenti fil-każini. Kienet opportunità sabiħa li fiha stajna niltaqgħu ma’ diversi persuni mill-komunità tagħna. Wara, il-membri żaru wkoll il-POs bar fejn ukoll qattgħu xi ħin mal-persuni li kien hemm preżenti.
Santa Marija: Festa antika fir-raħal tal-Gudja

Wara li fix-xhur li għaddew, deher tama li l-qilla tal-pandemija għaddiet, madankollu, ir-restrizzjonijiet maħruġa mill-Awtoritajiet tas-Saħħa għadhom fis-seħħ. Il-festa ta’ Santa Marija ta’ din is-sena se ssir biss fuq ġewwa minħabba li l-Awtoritajiet tas-Saħħa pprojbixxew milli jsiru festi esterni. Bħala Għaqda ħsibna li għall-festa ta’ din is-sena, nipproduċu dal-filmat ta’ informazzjoni interessanti għall-Gudjani dwar il-festa antika tar-raħal tagħna, ta’ Santa Marija.

Nawguraw ‘l Gudja kollha festa mill-isbaħ.